Eta hamarrak edo zirelarik

ageri zen ilargia zeruan,

hementxe beste edonon bezala,

itsasoaren gainean hementxe.

Zuri, handi, dotore sortaldean,

argazkitarako prest.

Alboratuko dute afaria

turista arduratsuek, jakina,

argazkigintzak du lehentasuna

oraintxe beste edonon bezala

ordu desberdinetan.

Japonian egin dituzte jadanik

argazki lainotsuak

tenplu hutsen artean,

betiko mendiaren magalean;

presatiak laboratorioan

lanean emaitzen zain.

Ilargia ilargi.

Ameriketan argazki makinak

prestatzen ari dira gauerako,

egutegietan ikusi dute

noiz den —gaur— ilbetea.

Edonon dago leku egoki bat,

hemen itsasoa da,

mendi ubel gorriak,

herrixka bat hondartzan.

Beste edonon bezala hementxe,

hementxe beste edonon bezala.

Ilargia ilargi.

Hondartzaren bukaeran etxe bat,

guztiz bestelakoa,

panpinen bizileku.

Gertaera goibelak ilargitan.

Zaharrek diotenez

gizon arrotz batek zuen eraiki

oso aspaldian alabarentzat,

uste baitzuen hemengo haizeak,

hemengo itsasoak,

senda lezaketela

haurraren gaixotasun hilgarria.

Bai ederra ilargi honen isla

teilatu isiletan. Min gordea.

Hementxe beste edonon bezala.

Ezer ez da berri, ezer ez zahar.

Heriotz ahantzi bat

beste mila heriotzen artean.

Ilargi bakar bat

mila ordutan, mila argazkitan

puskaturik, mila begiradatan.

Mila koloreko harri biziek

hatsa digute mindu,

beste edonon bezala hementxe,

non zeru-lurrek Arrieta izen

latitude honetan

bitxia hartu duten.