iraganaren ohituretara itzuli gara

potasio eta kaltzioaren artean sortutako ezaguerak

azalez deuseztatzeko. Inoiz baino ausartago

tolestatzen ditugu hitzen esangurak.

Atzoko izara dardartien mina berpizteko beldurra

uxatzen du ixiltasunak eta liburuak bailiran

gauzatzen dira gauero ametsak, xerak,

mihien arraildurak delizioski adabatzen.

Gorputz maitatua ukituz iazko galderak

laino bihurtzen dira, edo harea.

Anbarezko hegalen gainean emaro

hersten dira ezpainak, eta teilatuak.

Entzun poeta zaharraren hitzak,

jainkoek eskaintzen digutena goza ezazu, ene bihotza.

Geroaren zingiretan paseiatzen

edozein kaletan baino erosoago, arriskuak zer dira guretzat,

hiri debekatuenak ditugu ibiliak

eta haien terrazetan askotan eseri gara lasai.