JAINKOTIARRA

Poloniako hotza bezain zapalgarrizko

begirada zaharra

profilik gabeko puntu batean finko

ilusio bako

bizitza hilkorretik ezer espero gabe

bizitzen dakiten

idealek bezalaxe.

Gurpil zabaleko tiraderan

eskultura gisa

anderea katonatua

sendotasun izoztuak inguratua

metroko tunel baltzituan

txankak plastikozko poltsetan

baltsamatuak

itxi gabeko zamarra bihurria

Varsoviako matxinadan jantzitako

txapel iheslariarekin

konbinatua

higikortasunaren

bazter ahaztuetan

zaborrontziko

ogi kozkor bat miazkatzen du

aurpegipean asetasun perbertso bat

ezkutatzen duten begi zahar

eta pribilegiatuen aurretik

hiri osoa igarotzen zaion bitartean:

jainkotiar antzeko patxada

hain kolpatua

non apurtezin.