AKADEMIA

miseria tinkotzen duzu

betazala mugitu barik

bere burua engainatzen dakien

gelditasun

distantziakide batekin

aristokrata beldurtia

hala moduzko jatorria

existentzia higatua

zertarako nahi duzu

Hefesto surik gabe

Atenea Medusarik gabe

zertarako bere ezinezko ontologia

bere ahuntz armarria

bere latorrizko begi-niniak

zertarako hainbeste utopia

haustura barik

horrenbeste erudizio

ulermen bako

birsortzea kudeatzeko

zorigaitzeko aditua

pasioa laidotu eta latorrizko begi-niniak

puzturik

errausteko

zinikoki

            zure gorputz izoztu eta

            herdoilduaren ertzetan

            desioaren eta sorkuntzaren ezbeharrera

            zuzenean daraman

ibilbide galarazi horren

sorburua disimulatuz