Inguruan ditugun

otsoek peto-peto

so egiten digute.

Haien begi gartsuak

gure ikara gorria

islatzen deneko

ispiluak dirade.

Haien giharrak estu,

tenk, atezuan daude;

gezia erauzi hurran

dagoen arranbela

baten korda iduri.

Aiztorik zorrotzenak

herioak gorde ditu

haien irribarrean

Hemendik edonora

ihes egin nahi genuke,

baina gure haragi

mardul, dardarakorra

hagin zorrotz horiekin

maitemindurik dabil.