Poesia kaiera
Poesia kaiera
2002, poesia
64 orrialde
84-95511-37-1
Luigi Anselmi
1954, Bilbo
 
 

 

Goazen ortzimugaz haruztik

dautzan uhalde ezezagunetara...

Gure ontziaren oihalek

sastagaiak balira bezala

laino errezelak urratuko dituzte

atzean utzitako apar-bideak

ezabatzen diren bitartean...

Goazen, goazen itsasoan zehar

uhin urdinak zamalkatuz,

oraindik inor heldu ez den

hondartzetara.

Hara non malkoek eta begiek

ez baitute elkar ezabatzen.

Hara non inork ez baitaki

zein den odolaren kolorea.

Hara non ilargia eta eguzkia

elkarrekin ibil baitaitezke.

Goazen bada, goazen azkar

eta lehorra ikusterakoan

bota ditzagun uretara

itsasorratza eta lema.