5. EHORZTETXEA

 

 

(ehorzlea sartzen da renataren gorpua dakarrela. Ondoren, ama eta aita sartzen dira negarrez.)

 

ehorzlea: Ongi etorri Agur-Ben-Hur ehorztetxera. (gurasoak negarrez hasten dira. ehorzlea kronometroari begira) Nahikoa da. Gainditu duzue negar-muga. Hartu arrosa koloreko pilula galeraren mina desagerrarazteko.

 

(Pilula hartu eta negar egiteari uzten diote. Berriz triste aurpegia jartzen hasten dira.)

 

ehorzlea: Ez egon triste. Lasai, gure gobernuak arazo guztiak konpontzeko soluzioa dauka, protokoloa jarraitu besterik ez dugu egin behar.

ama: Zer gertatu zaio?

ehorzlea: Tximistak begian jo du.

aita: Artista izan nahi zuen…

ehorzlea: Horrelako gauzak gertatzen zaizkie artistei.

 

(ama renata ukitzera gerturatzen da.)

 

ehorzlea: Ez ezazue ukitu. Begiratu, ikusi bakarrik. Ikusten?

 

(aita eta ama renataren ondotik pasatzen dira.)

 

ehorzlea: Nahikoa da. Begiratze-muga gainditu duzue. Aurrera jarraitu behar dugu, ezin dugu denbora alferrik galdu.

 

(Negarrez hasten dira. ehorzleak iragarkia jartzen du eta pilula bana ematen die lasaitzeko.)

 

iragarkia off: Pirulin X2-34: euforikoa, narkotikoa, haluzinagarria eta ondorio negatiborik gabea. Etxekoen heriotzaren aurrean, errealitatetik oporrak hartu eta buruko minik eta mistizismorik gabe itzultzeko aproposa. Doluan denbora galtzea, aberrazio hutsa da!

aita: Zenbat hartuko ditugu egunean?

ehorzlea: Aurreneko bost egunetan hartu nahi adina. Ez utzi minari etortzen. Utikan mina.

ama eta aita: Utikan.

ama: Atera dezakegu azken argazki bat?

ehorzlea: Bai, noski.

 

(aitak mugikorra atera eta renataren ondoan jartzen dira hirurak, selfie bat ateratzen dute.)

 

guztiek: Dindon.

 

(Argazkia ateratzearekin batera renata piztu eta beste pertsonaien ahotsak entzuteari uzten diogu. renata mahaitik altxatu, bere gorputza begiratu eta beste plano batean dabilela ikusten da. aita, ama eta ehorzlea badoaz.)