ONTZIAREN SEMANTIKA

III. Reicheko teorikoek diote urpeko borroka

Kortsarioen gerlaren berpiztea besterik ez dela

Ahulek indartsuenaren aurka asmaturiko legezkotasuna

Armek gehiago egin omen dute berdintasunaren alde berbek baino

Eta ume batek ezin du zain egon jostailua mustu gabe

Agindu zuzenak etorri artean bere erantzukizunak

Hartzen ditu urpekontzi aleman bat dauka aginduetara

Ingalaterra guztien salaketa bereganatzeko

Handiek ezlegezkotzat harturiko arma

Humanitateak kondenatu egin duen asmo baten alde

Besterik ez dut behar XXI. mendeko portu neutralak

Ikaratuko dituen iduri bortitza egiteko

Urpekontzi nazi bat kapitulatu nahi ezik

Eta haurtzaro luze batek TBOetan irentsi zuen Otto eta Fritz

Guztien ankerkeriaz armaturik munduratuko naiz

Demokrata zintzoen kondenari bularra zabalduz

Deabrua ez zaigu inoiz bidera irten hitzarmenik eskaintzeko

Gure itzalak ez du balio ez dut uste arimarik daukagunik

Ahulegiak gara infernukoek kontuan har gaitzaten

Itsasoratze hau ez da madarikazio eternal bat beraz

Indar koerlazioaren ondorioa baizik

1959an II. Mundu Gerla aspaldian amaitua zen

Baina Otto eta Fritzen fantasmak hantxe zeuden

Torpedoen hodietan gordeak ume baten belarrira gozo

U-115 urpekontzi abandonatua Gran Solen

XX. mendeko azken balea kuadranteko kaian lotua

Bitakora kaier berriak idatzi nituen

Meridiano guztiak antolatu nituen ostera

Jazarrerako hodi hutsak hornitu nituen

Marinela izandako guarda alkoholikoaren antzeko

Fantasma bizartsuen eskifaia erreklutatu nuen

Gorila sarjentoa Johnny tenientea Eisenhower jenerala akabatzeko

Ez dakit itsasoak zentzu historiko bat emanen digun

Nire herritarrek beti nabigatu dute drapo arrotzen pean

Gerlari trebeak izan dira lan-indarra nornahiri saltzeko eta bake aroan

Hemen beti eman izan zaio apaizari balearen mihia

Menturaz Mendebaldearen madarikazioa hartu beharko dugu geure gain

Bete gabea daukagun zeregina kunplitu ahal izateko

Baldintza objetiboen gainetik dago heresiaren lilura