TOPONIMIA

On Ramon de la Sotari seme-alabak baino

Ugariago zetozkion ontziak

On Ramon de la Sotak zekien euskara baino

Gehixeago jakin behar zen bere ontzi guztiak euskaraz izendatzeko

Euskalduna ontziolako nagusia zen arren

On Ramon de la Sotak On Resurrección María de Azkueri

Egin zion galde zer izen ipini ontziei

Eta Euskaltzaindiko lehendakaria izanen zenak

Bizkaiko mendien zerrenda eman zion ontziak bataiatzeko

Jata Mendi bizirik irten zen I. Mundu Gerlatik

Genova Bordele Cardiff Marseila mina guztiak libratu zituen

Baina 1936an zahartua zegoen pikategian zeukaten

Eta nire portua hartu behar zuten faxistei traba egitearren

Bilbotik ekarri zuten irailak 12 arratsaldeko 4etan

Irten ziren ontzi guztiak 140 baxurako eta 3 bakailaoketari

Jendez beteta portua hutsik faro guztiak itzali ziren tiroka

Jata Mendi atoian eraman zuten bokaleraino eta

Esan ohi da pailotak nahita egin zuela maniobra oker

Hondoa jo zuen korastak Kalaburtzan trabes gelditu zen

Ez zuten guztiz hondoratu ahal izan baina

Faxistek mendiz hartu behar izan zuten portua

Teknikari alemanak etorri ziren Hamburgeko Bugsier etxetik

350.000 marko urre eskatu zuten garestia zen gerlak asko behar du

Eta orduan Ondarroako Manzisidor azaldu zen

Bere hiru semeekin 120 egunean aterako zuela hondoratutako zatia

Beste 50 behar izanen zituela korasta pikatzeko

Merkeago zen bere eskaintza eta esleitua izan zen

Baina Armada Altxatuak gerlaren premietarako bahitu zizkion

Talde autogenoak bokalea garbitu orduko eta Jata Mendiren korasta

Lehorrean gelditu zen izena brankan zuri

Heinkelek bonbardatzen zuten Jata mendia bezain egoskor

Toponimo baten setaz

Mendeen gainetik 1936ko irailetik 1937ko abuztua arte