«Isilean pasatu den beste bat Koldo Izagirreren Balizko erroten erresuma poema liburua da. Hau iruditzen zait niri iaz argitaratutako libururik onena. Zoritxarrez, gurean hain gaitzetsirik dagoen poesia saritzeko aukera on bat galdu da “Euskadi” saria Babiloniari eman diotenean».

«Koldok bere buruari disziplina izugarri estua ezartzen dio hasieratik, eta ihesbide poetiko guztiei muzin eginez praktikaratzen du eredu teorikoa poemaz poema. Irakurleak eta gainerako poetak ere hasieratik kontra jartzea nahiago du».

«Gogo-ihardunek ez ninduten sekula santan indiferente utzi. Liburu honek ere ez. Arrazoia du dinamita dela esan duenak. Arrazoia du. Dimamita da. Baina hainbeste ur eta ibaitatik pasata, dinamita bustia. Hitza besterik ez».

«Literaturaren artifiziotasunari uko eginez, zintzotasun, autentikotasun eta bertutearen maskararekin agertzen da. Halare, ez dut uste maskara hitza gogoko izango duenik. Beldur naiz ez ote den ahots ziur eta bakarreko poetaren diskurtsora egin den itzulera».

«Beste idazle abertzale batzuengan ere joera bera nabaria da. Izan ere, pentsamoldea idazmoldearekin bat egiten duenean, hitzaren artearen barruan hitzen arteko tarteak ere antzematen dira. Inguru-minguru ibiltze horrek idazkera zaildu eta, bidenabar, edertu egiten du».

« Liburu hau kalera atera bezain laster norbaitek ziplo bota zuen dinamita hutsa zela. Laster asko beste batek arrapostu, dinamita bai baina bustia zela, paperezkoa alegia. Egia, noski, baina hori esan zuenak ez bide zekien dinamista bustiak ez duela indarra galtzen, kontrolagaitza bihurtzen bada ere. Beraz, auskalo halako batean eztanda egingo ote duen».