KOMUNISMOAREN BERRI

1936tik hona 30 urte bake datoz

Ez ditu hautsiko gerlaz geroztik

Portuan sartzen den aurreneko ontzi sobietikoak

Dimitri kapitainak pailota eskatu du

José Díaz du izena Odessako zamaontziak

— Bafore gorria heldu duk!

Ardora handia sortu da portuan

Komandantzian alerta eman dute

Moila batetik bestera dator albistea

Garabiek zeinuak egiten dizkiote elkarri

Estibadore guztiek nahi dute han

— Bafore gorria heldu duk!

Umea Marco Polo da orain

Veneziako kaietan ume

Urrunetik ekarritako berbei adi

Korapilo guztiak egiten badakiela erakutsiz

Txoren bat behar ote duten

— Bafore gorria heldu duk!

Badatoz karabineroak zurrun

Errusieraz jakin nahi lukete

Espainiaren urrea Moskuri eskatzeko

Kazetariak galdezka hasi dira Dimitrik

Espainieraz egiten du txatarra dakar

— Bafore gorria heldu duk!

Emakumeak zauzkatek makiniletan lanean

Esan dio karabineroak

Txanpon berri bat eskuan duen umeari

Horrelakoxea duk komunismoa

Ez dik ez ama ez alabarik errespetatzen

— Bafore gorria heldu duk!

Portuan inork ez daki errusieraz

Eta horregatik dakar José Díazek

José Díaz tximinian handi

Espainola du izena ontziak

Latin karakteretan irakurgarri

— Bafore gorria heldu duk!

Umeak ez daki zergatik daukan

Izen espainola ontzi errusiarrak

Eta José Díazen akordurik dutenek

Ahapetik egiten dute hitz

Division Azulen bolondres ibilitakoa da amanterua

— Bafore gorria heldu duk!

Oso gerora jakinen zuen ume izanak

José Díaz ez zela Porfirio Díazen anaia

Txalotu zuen errusiarren detailea

Zentralismo demokratikoaren arabera

Espainia baita gure portua

— Bafore gorria heldu duk!

1966ko kopekean daude igitaia mailua izarra

CCCP oinarri duen mundu-globoaren koroi

Gauean malenkoniatsu biltzen ziren

Kantari marinelak txopan

Oroitzapen hutsa den banderaren pean

— Bafore gorria joana duk!