UME GOIZTUA

Stevensonen liburua irakurri baino aunitzez lehenago

Piratak ikusiak zeuzkan labana gerrian

Dordoka Uhartean bizi zen umea

Alemanek eraztuna daramate belarri zulatuan

Kolonia edaten dute finlandiarrek

Hilero harrapatzen du trenak marinel hordiren bat

Geltoki ondoko etxetik datorrelarik

Eta harri kozkor odolduak hartzen zituen eskolan erakusteko

Ortozik ibiltzen da V-18ko kubertan soldadu bermeotarrekin

Holandarren besoetan ikasi du nola marraztu behar duen emakume biluzia

Valletta Bristol Istambul Maracaibo Bremen Oporto Monrovia

Lagundu egiten dio konferentziak jartzen Stella Marisko Maruxari

Portu guztietako prefijoak dakizki eta baita taxiaren zenbakia ere

Filibustero aspertuek Seniorritas eskatzen diotenerako

Yuri Gagarinen argazkiak munduaren orbita

Egin zezan baino aunitzez lehenago zen ikusia

Astronauta bat Mañuel laneko jantzian

Itsaspeko Bidaiaren 20.000 Legoako portada hartan bezala

Neil Armstrongek demostra zezan baino

Aunitzez lehenago zekien nola ibili behar zuen

Gizakiak ilargian Mañuel daiberrak lehorrean bezala

Gaur ere ez zaidak azaldu olagarro erraldoia

Esaten zion 1930eko Siebe Gorman modelotik izerdi malkotan sortuta

Baina hau aurkitu diat hor behean latoi distiratsu bat

Burdina oker bat torloju herdoildu bat umearen eskuan

Puska hauek Titanicen hondakinak dituk

Makarios artzapezpikuaren bizarrak

Edo Ethniki Organosis Kyprion Agonistonen historia

Multikopiatua ezagutu baino aunitzez lehenago

Umeak amets egiten zuen aberri batekin

Aberri guztiak bezala uharte aberri jatorrak bezala txipi

Ez zegoen bandera hura baino elastiko politagoa

Zeukan futbol talderik Larnaca Famagusta Limassol

Mahas-pasak bezain izen gozoak ziren lurrin garabiak zeuzkaten portu haiek

Mediterranioa urdina zen belaontziz betea zegoen

Umeak paradisu bat amesten du Txipreko ontzian

Liskar bat sortu dela jakin gabe Mañuelek

Aurkituko ez duen aizto bat dator hondora

Marinel turkoek bakean uzten dute marinel grekoa lasai odolusten