Hollywoodeko elegiak

                  1

Hollywood herrixka uler daiteke hemen jendeak

zeruaz dituen ideien bidez. Hemen

pentsatu du jendeak, Jainkoak

zeruaren zein infernuaren premia izanda ere, ez duela bi

establezimendu irudikatu beharrik, baizik eta

bat bakarra, hau da, zerua. Horrek berak

balio baitu baliabiderik, arrakastarik gabekoentzat,

infernu modura.

                  2

Itsasertzean zutik petrolio-dorreak. Haitzartean

zuritzen dira urre-bilatzaileen hezurrak. Euren semeek

eraiki dituzte Hollywoodeko amets-fabrikak.

Lau hiriak

gainezka daude filmen

petrolio-usainaz.

                  3

Los Angeleseko aingeruak

akituta daude egiteaz irri. Iluntzean

erosten dute fruta-merkatuen atzean,

etsita, flasko txikietan

sexu-urrina.

                  4

Piperbeltz-zuhaitz berdeen pean

doaz musikariak ilaran, binaka-binaka

idazleekin batera. Bachek

hari-laukote bat dauka poltsiko txikian. Dantek

mugitzen ditu ipurmasail maskalak.