jazza

 

jazza isiltasuna urratzen

duen garrasi bat da

kaosa da jazza da

iskanbila da sumina

gezurren aurkako arma bat

eta begiramenik gabeko zintzotasuna

da jazza

izukaitz hiltzea

heriotzaren beldurra

 

jazza bluesaren

ahizpa da

 

melodiko eta dramatikoa

bizi eta apetatsua

xuxurlari eta orrozalea

da jazza

jazza da irritsa

da goseti eta lizuna

da bizitzea eta maitatzea

da oinazea

 

jazza da borrokaz

betetako harmonia

 

xelebrea da jazza

sarkorra zolia

isila

deserosoa

atsegina desatsegina

jazza

da beroa hotza eta epela

ezkontzaren eta

dibortzioaren artekoa

pipermina eta krispeta

da jazza

 

jazza haur bat da

gizona eta emakumea

 

jazza bluesaren

ahizpa da soularen

neba da

ella fitzgerald da

miles davis da

john coltrane da

betty smith da

jazza

da tronpeta da saxofoia

ahotsa

zu eta ni

 

hori da jazza