Galera mota bat

Elkarrekin erabiliak: urte-sasoiak, liburuak eta musika.

Giltzak, te-katiluak, ogi-zorroa, maindireak eta ohe bat.

Hitzen eta keinuen arreo bat ekarria, erabilia, xahutua.

Etxeko araudia behatua. Esana. Egina. Eta eskua beti luzatua.

Neguaz, Vienako septeto batez eta udaz maitemindu naiz.

Mapez, mendiko herrixka, hondartza eta ohe batez.

Kultu bihurtu ditut datak, ezin baliogabetuzkotzat jo promesak,

miresmena izan diot zerbaiti, gupida ezerezari,

(— egunkari tolestua, errauts hotza, paper-zatia ohar batekin)

izukaitz erlijioan, ohe hau eliza.

Pintura agorrezina, laku bati begira egotetik.

Balkoitik herritarrak, agurtuak izateko gogoz bizilagunak.

Kolorerik biziena sutondoaren aldamenean, segurtasunean neure ileak.

Ateko txirrina, neure poztasunaren alarma.

Ez zaitut zu galdu,

mundua baizik.