Sanguis martyrum

Europar sinesmenagatik

bizia eman duten Euskaldun sorgin,

azti eta belagileen oroitzapenetan.

Ene herri on bakezalea,

eliza zuriz betea,

Goizerritiko Jaungoikoaren

herri hautetsi maitea,

Hire zerua garbi duk, keak

hegoak ditik ohildu;

oihartzun gabe hire oroitzan

auhenak dituk isildu...

Zuen auhenak, ene arreba

plazetan errauts eginak,

gizon beltz heiek erre zaituzten

Euskal Herriko sorginak!

Sekula zuen martyrioa

ez da kantatu euskaraz.

Niketz oroit naiz: dietzadala

bertso berriak sortaraz.

Zinez alperrik hil zaretea?

Galdu zarete orozbat?

Ezin da... ezen zuen odola

date pagano-hazi bat.

Zuen odolaz erein 'tutzue

Europako laur hegalak,

zuhauiek eta zuen ahizpek,

oi! apez-eme apalak.

Belaunik belaun zueri esker

da begiratu azkarra

geure leinuak asmaturiko

teologia zaharra.

Zuen arima Gazte-Lurrean

kontsolaturik daudenei,

arartekotzat harturik eta,

egiten diet egun dei.

Zuen bitartez hunki ailitza

zorioneko egoitzak

Ortzi-Thor edo Akher Beltzari

nik dagiodan otoitzak:

Zu, eta bertze jainkoak ere

hor zinetenak aspaldi,

gure arrazak adoratuak

gizaldirikan gizaldi,

Mari Munduko, basajaun-jainko

oker jakitun osoa,

jainkosa zaintzen zenituztenak

ibaia eta basoa,

hil ez zaituzte gizon beltz hauiek,

lotan zaudete bakarrik;

gure bihotzak adi 'tzazue,

jaiki zaitezte, atzarrik!

Baal arrotza ukatzen dugu,

zuentzat berriz sagara

eginen dugu aldareetan

zatozte, arren!, zain gara.

w1966

Musika: Antton Valverde