Poesia kaiera
Poesia kaiera
Chuya Nakahara
itzulpena: Hiromi Yoshida
2017, poesia
64 orrialde
978-84-17051-03-7
Chuya Nakahara
1907-1937
 
 

 

Gazte egin arteko kanta

 

 

                           I

 

            Haurtzaroa:

nire gainean ari zuen elurrak

lumatza kotoizkoa ematen zuen.

 

            Nerabezaroa:

nire gainean ari zuen elurrak

elur busti maskala ematen zuen.

 

      Hamazazpi eta hemeretzi urte artea:

nire gainean ari zuen elurra

txingor eraso legez barreiatu zen.

 

       Hogei eta hogeita bi urte artea:

nire gainean ari zuen elurra

harriabarra zela egin zitzaidan.

 

       Hogeita hiru urte:

nire gainean ari zuen elurrak

elur-bisuts printzatu ematen zuen.

 

       Hogeita lau urte:

nire gainean ari zuen elurra

isil-isil etzanda pausatu egin zen.

 

 

                           II

 

Nire gainean ari duen elurra

lore-hosto balitz bezala ari zait pausatzen.

Surtan den egur hotsa adi daiteke

Iluntzen ari dela ortzi izoztua.

 

Nire gainean ari zuen elurrak

Zeharo airos eta iragan minez,

Nigana luzatuta zeuzkan eskuak.

 

Nire gainean ari zuen elurrak

Bekoki berotuan jausten zenean,

Malko-erreka dirdai ematen zuen.

 

Nire gainean ari zuen elurra

Bihotz barne muinetik eskertu nuen,

Zorretan nintzen,

Luzaroan bizi nendin otoiztu nion Jainkoari.

 

Nire gainean ari zuen elurra

Zinez, benetan, elur aratza zen.