AUTOBUSEAN
Mugarantz naraman autobusean
entzun dut atzeko bikotearen solasa:
— Maite zaitut —dio mutilak.
— Zergatik? —neskak.
— Ez dakit... polita zarelako, agian.
— Horregatik bakarrik maite nauzu?
— Ez, beste zerbaitegatik ere izango da.
— Zergatik orduan?
— Ez dakit. Orain ez zait ezer bururatzen.
— Beraz, ez nauzu maite.
— Ba ez, ez zaitut maite —dio mutilak.
— Zergatik? —neskak.
Veronan Trentora lanera doazen
puta nigeriar lirainak igo dira;
kantari egin dute ordubeteko bidea.
Adornoren liburua hartu dut berriro:
«Alemanez, boterea eta indarkeria hitz bera dira».
Munichera narama autobusak.
© Kirmen Uribe
