HONDARTZAN

eguzkitakoa zabalduta

erdi etzanda nago eklipse intimo honen barnean

jendea batetik bestera oinak uretan sartuta

batzuk azala xigor

txikiak ur ertzean jolasean

utzi egin dut irakurtzen ari nintzen liburua

ondora etorri zaigun saltzaileari

jela arteko garagardoetarik bat hartu diot

hego epel batek mugitzen dizkizu ile xerloak

niri begira zaude

harri-koskoak ziruditen kezkak

haizeak eraman ditzakeela iruditu zait

geratu gabe ote dabiltza trenak munduko bazterretan

askatuko al da goiko bizilagunekin dugun afera

noiz tokatzen zaigu berogailuaren errebisioa

lata zabaldu dut

psssss

airean doa azken beldurra