SEMAFOROA

gorri dago semaforoa

oporretatik bueltan gara

jendea zebra-bidean bestaldera

zuhaitz ezagunak bazterretan

bihurgune bat eskuinetara gero zuzen aurrera

ezkerrean zelaiak eta turistentzako amu eliza handia

ederra da etxera itzultzea

leihotik aterea daukazu eskua

ur ertzean izango duzu gogoa beratutako behatzetan

alabari begian zakarra sartu zitzaion goiz hartan

edo malekoiko paseoan arratsalde amaigabean

urperatu nahi ez zuen buia gorria

eguzkia zeruertzean

lepoa jiratu eta bion egonezinek topo egin dute

eutsiko al diogu abiatzear den egunen segida berriari

nahikoa indar pilatu ote hurrengo geltokira iristeko

zeri heldu orain eguna nabarmen mozten hasi denean

poltsatik boligrafoa eta papera atera dituzu

berdera egin du semaforoak

enbragea askatu eta badoa denbora

ez dakit

erosketen zerrenda osatzen hasi zaren

edo ihes egiteko krokisa zirriborratzen