DIMENTSIO PARALELOAK (IV)

tinbrea jo dute

galdara konpontzera datorren teknikaria da

berokiak jantzita beste bi aktore sukaldean

bakeroen filmetan bezala bihurkinak gerrian

bisera eta eskuan erreminta-kaxa

paparrean su txiki baten irudia

hau da existentziak epeltzera datorren heroia

berogailua dagoen txokora doa zuzenean

eskatzeko behar duen edozer

bakean utzi dute bere lana egin dezan

kamerak teknikariari jarraitu dio

torloju bati jira bestea askatu

hoditeriako pieza buxatua aldatu eta

berriro ireki du kaspio itsasorainoko pasabidea

iturriari ematean eztanda txiki bat

suzko geiser ñimiño baten irudia pantailan

teknikaria joan denean komunera begia

bertan daude beste biak

ura berotu artean arropak eranzten

ur-jausi pean sartu dira eskua emanda

ezin da zoriontasun ederragorik irudikatu