Urtu aurretik
Urtu aurretik
2022, poesia
88 orrialde
978-84-17051-83-9
Xabi Borda
1981, Azpeitia
 
2004, poesia
 

 

ALKIMISTA

 

 

pipeta barruan zerbait berdea

kubetan antsietatearen zigarrokinak

bakardadearen bizarrak

hezur hautsa ondo xehatua

nahastu dituenean lurruna hoditerian barrena

arku elektrikoak hodei sintetiko sortu berrian

betaurrekoen babesetik begiratu dio likidoari

tututik tantaka beldur destilatua

 

pototxoak eskuetatik irrist

big bangaren ostean zipriztinak lau haizetara

bata zurira iritsi zaizkio ikararen molekulak

jantzia zulatu ileak erre azal barnera sartu

gorputzeko zelula guztietara

zainetako lasterrak zabalduko dizkio orain

 

muskuluak uzkurtu hezurrak txikitu

azala ilundu hankak okertu

begiak handitu

aurpegia aldatu zaio zientzialariari

musuzuloetatik bi antena handi atera zaizkio

kantuan ari da dardarka

 

bat-batean zarata arin batzuk

oin-hotsak pasilloan

izuak mututu egin du

isilik da katastrofea gertatu den gela

 

badoaz pausoak

jada ez da ezer entzuten

dardarka berriro

kantuan hasi da kilkerra