ASTROFISIKA

koilarari eragitean zulo beltz txiki bat katiluan

hor behar dute eskumuturretik eroritako minutuek

ilunpetik atera ezin diren margoek ezinezko akuarelek

hor behar dute azkenik gabe geratu ziren adioek

eulirik ez gure inguruan

gelako hormek ez dakit noiz arte eutsiko dioten

heldulekuren bat bilatu nahi dut zure aurpegian

zuloaren alde honetara lotuko nauen haga

larri begiratzen diot kafeari

dena badoan istantean horra zure ahoan gordelekua

saltaka noakizu hitz batetik bestera

jausteko beldurrez

ez eten solasa lotu esaldiak atertu gabe

esan berriro kontu horiek itxaron iezadazu ahoa zabal

behera so egitean mundua dakusat

azukre koskorra katiluan desegiten