ESTROPADA

Nola edo hala genuen jo

Parte Zaharra Donostiako

eguna argitu berri

terraza batean ginen jarri

gaueko enarak egarri

arroltze frijituak eta xingar-magra jatera

jokatzen baitzen goiz hartan Kontxako bandera

eta gu ere, nola ez, parte hartzera

Izpiritu ttantta kafe beltzari

zintzurretik beheiti

(horra gure dopinaren misterioa ageri!)

eta estropadarako prest gu beti

Juezak agindu zotz egiteko aratz

erabakitzeko nondik hasi, zein karrika

Kanpandegi, Arrandegi, Ikatz

San Jeronimo, Narrika

Calbeton eta Aldamar

denak egin genituen, irrintzika!

ez kexaka, espantuka eta marmar

nola izaten baita, hamaikatik hamar

eskifaia loriosetako arraunlari horien musika

Hori bai, ez dakit hasteko tenore

zer ekipotakoak ginen, noren bezero

baina hondarrean denek more

akabatu genuen: Biba San Pedro!