ALTURAREN NEURRIA

Ez zara gehiago izango tente ipini eta, altura neurtzeko,

                                      burua altxatzen zuen mutikoa,

Bi astetan hiru zentimetro hazi zinela esango zizun aititek

                eta bazenekien hurrengorako ere haziko zinela.

Lapitz, boligrafo edo labana arrasto horizontalak

            ikusten zenituen ateko marko zaharrean.

Ez zara berriro izango joko ondorio gabeetara

                                      jolas daitekeen umea.

Kartzelara sartzean neurtu zintuzten metalezko aparatu hartan

                                                        Heldu zara.

Inork ez dizu berriz altura neurtuko. Ez zara gehiago haziko,

                      baina zure altura jadanik zeure eskuetan dago.

Nahiz eta ez den inongo markotan apuntatzen makurkerien

                                          artean zutitzen direnen garaiera.