Kopla galaiak

Ilargiak du gandua

ikus izarren gorua

zu bezalako neskatsek dute

zorabiatzen burua

Mertxikak hezur gogorra

arin hegan istingorra

beltxaran: zure gerri zalua

nire sukar eta lorra

Umotu da okarana

dager mardul'ta otzana

zure bularrak nire ametsa

urrun katigu darama

Ederra udan hostoa

naharo dago basoa

zure sutean kixkal-xamurra

nire maitasun-lastoa

Erbia jauzika landan

zezena urduri langan

nahiago nuke, sorgin, ahal banu

zurekin jostatu galdan

Haritzak gogor ezpala

pagoak zabal itzala

gogo etsiaz dagizut neure

azken agur-diosala

Mendian zital bisutsa

oihan-bakardade hutsa

han nagoela nahi izaten dut

hiriko hotsa eta hautsa

Iturritik dator ura

elkitzea bai tristura

pausalekurik ezin ukana

bidaztiaren malura

Ederra elur-maluta

jantzi hauskor xuri du-ta

bizi naizeño ez da galduko

nik zutaz dudan gomuta

w1982