Oroipenen lur beltza haztatzerakoan,

loak, urrezko aitzurrez, irekitzen du

garrasi itoen kriptarako bidea.

Barnenean harpetako latzikarak berberak:

zapore mikatzenak mamuz antzaturik;

fantasia eriosuhar; eta fikzioan

—beldurgarri— herio aurreko trantzeak.

Aspaldiko une asaldagarriak —larriak—

azpikoz gainera iraulirik —bizirik—.

Gizakien baitako aztarnategian, antzinateko

ispiluen pusketak aurki daitezke.

Beira konkaboak. Izuen sikodramak.

Leizetik oihuka datoz, barrura

ez sartzeko arrenak. Eta egunaren

serafinak hegalez eragozten du

piztien putzua. Itogarriak, zinez,

superstizio zuloen gaueko hotsak.