Hondarraren gainean biltzen den harri koloreduna bezala

lehortu ondoren,

gristatu delako,

desengainaturik,

erortzera uzten den harri koskorra bezala

aurkitu nauzu

goizean,

sartu baizik nahi ez duen

lainoa leihoan bezala

kotxearen faroek bereganatu duten

intsektua bezala

liburu bat lapurtzen hartu duten

estudiantea bezala

larre leun baten erdian

ahaztutako kotxea bezala

haizean dantzatzen diren

eskutitz bateko pusketak bezala

estazio batean abandonatutako

maleta zahar bat bezala

jende artean

biluzik aurkitzen dena bezala

asperraldiko

aho-zabaltze bat bezala

bide ertzean nornahiren omenaldiz

jarri den harri bat bezala

kalendarioaren

orri zahar bat bezala

itsas barrenean

alferki oihuztatzen den sirena bezala

luzaroan haragian irauten duen kolpearen

oinazearen oroipena bezala

amets gaiztozko gau batek

lardaskatutako ohe bat bezala

hitz esan gabe bat bezala

hitz entzun gabe bat bezala

hitz ulertu gabe bat bezala

hitz pentsatu gabe bat bezala

hitz arrotz bat bezala

hitz ahaztu bat bezala

aurkitu nauzu

goizean,

beste norbaiten izenaz markatutako koilarea daraman

zakur arkakusoz betetako bat bezala.