ELURRA SAN ANSELMON

Justu gabon aurretxoan

iruditu zitzaidan Leungane lainopean,

baina ez zen Leungane,

ospitalean geunden eta lobatxoa jaio berri zen.

Arbolen argia txarteletako dirua suzko gurdiak

dena zen ezdeus

denok utziko ditugu noizbait

haitzuloetako pinturak erdikinean

etorri berriek buka ditzaten.

Nire artean nioen

lehenago guretzat tontor zuriak zirenak

gero ezer ez inorentzat.

Orain etorri zait. Zapore mikatz hau da

hil zaizkidanengatik, orain etorri zait.

Odola atera zitzaion txizan

eta aurpegia zeukan erdi errea,

lobbista izan naiz, ama izan naiz

errepikatzen zuen, ama izan naiz,

eta masajeak ematen zizkidan justu tripa azpitxoan

eta kendu zionean haizeak

kimioterapiaren kamuflajea

musu eman nion eta zabaldu zuen hazi bat kirastuna

zeinetik ez zen ezer erne

eroan egin zuten loreek, loreek, begira, badoa

hiru haur eta alargun mirarizko bat utzi ditu.