BATETIK BESTERA GOGOA

“Hemendik doa gurdibidea Zeberiora”

esan zidan “hemendik” begiekin

eta nik ezin ezer ikusi,

kamamila itsaso bat.

Berak ostera Maurizia ikusi bide zuen

bere gomutamenean

mutil lagun Karakolengana zihoala, edanez

jada desagertutako iturrietatik

zoratu zintezke, benetan zoratu,

hainbeste kamamilarekin.

Ez dakit zer gertatzen den beste munduetan esan nion

“ixo” esan zidan atzamarra jarri zidan ezpainetan

“entzuten txakurren izpirituen zaunkak,

entzuten sugegorri indibidualisten solasa?”.

Argia itsugarria zen, hego polotik ipar poloraino,

Artizarra geldi Virgon

“hemendik doa Esne Bidea Zeberiora”

esan zidan nik uste

eta gerokoago batean

banindoan bakarrik Larragoitirantz

formarik ez neukan nik, modeloak ziren denak:

astalarrosak, basa azenarioak, txori gereziak…

“Hemendik doa Zetaren Bidea Zeberiora”

eta Errosa etxe portalean, Mari etxe portalean,

nire ahizpa hilak, putzu itzal-itzaletako igel gorriak

karistiar emakume behin desagertuak eta orain

leku guztietan daudenak.