- BAT
- BI
- HIRU
- LAU
NEGUKO HITZAK
edozer lortzeko adina indar badugula ematen du
baina ez da egia
nahi izatea aski dela
ate guztiak zabal daitezen
nahikoa dela gogoa
elurrari ekiteko edo atertzeko
eskua eskuaren bila abia dadin ilunean
ez da egia beldurrak janda bizi garela:
luxuzko animaliak gara
denbora daukagu
ustez denboraren aztiak gara
urteak eta urteak ditugu
denbora azpildura guztietan
zorionaren euliak gizentzen
eta ezin dugu etsi gure aldia amaitu zela esanda
berriak badatozelako aringarriarekin
ez dira egia batean kabitzen
gure beldurra eta indarra
zeru erdi mamurtua utziko diogu jendeari oinetan
eta kosta egingo zaigu esplikatzen
horrek behar zuela gure ametsen sabaia
absentziaren iragan gertua izateko galdu genuela
horrenbeste urte eta neke
baina geratzen zaigun denbora ahitu zain
bizi behar badut
minbizi txar batek noiz eramango
nire orduen alde hiltzen dituztenen orduak jaten
nire minutuengatik
dana emoten ari direnen
mendea xahutuz
gezur hobietan erreko da nire hitza
porrot caviar baten aparretan
© Jose Luis Otamendi