Susa-ko liburuak

HITZEZKO AUZOA

belar gorrituaren durduzamendurik sortuko ez badizut

oker ibili behar dut iparraren mende

hitzen errepublika bat aldarrikatu nahian

eguzkiak zartatu teilatuak bezain biluz

agertzeko adorerik ez badut

ez nuke azaldu behar jendearen aurrera

inorentzat nahi dudan hitzezko herri honetan

urruneko saminak biltzeko ez banaiz kapaz

gurasoen omenez lore eskaintza aski bada

ezina errenditzeko

poesiaren aihotza uztea nuke onena

agian besteren egiatan

neurea bilatzeko unea iritsia da

eta belar gorriak haizearen eskua itxarotea baino ez du

besteren ederrean etzan gura eskuzabal hau gordeta

gaitza da agindu ez diren hitzak ahaztea:

batzuetan nahikoa oldoztu bako

ekandu ergela da bizirik segitzea