BAI, BAINA EZ HAINBESTE

Ilunabar paregabeak ikusten dira

zure gelako leihotik.

Giltzurrun bat emango dizut gela horren truk.

Giltzurruna eta ezker eskua.

Giltzurruna, ezker eskua eta behatzak.

Ez dut uste beste ezer

eman diezazukedanik; nire etxea

ez bada.

Posible banu

bi begiak eta eskuin eskua

ere emango nizkizuke,

baina orduan ez nuke atea

irekitzen jakingo.

Posible banu

bi begiak, eskuin eskua eta bular biak

ere emango nizkizuke,

baina ez dut uste horren plazer

iheskorrari

horrenbeste haragi ematea zilegi denik.