TRANSMUTAZIOAN

artilezko txano zirtzilduak

heroinazale berriak aireportuko lurreratze pistan

lepo-hezurrak puskatuta dituzten eskalatzaileak

atearen bi aldeetan performance berdinak

erregea ez dago lo eta ez dago esna erregina

hortzordeak champagne kopan

nire buruko monje budista immolatzear

hatzen artean zotz txinatar zorroztuegiak

itsuak ez du negarrik egiten tipula mozterakoan

anaia siamdar mozkorrek ze bide hartu ez dakite

norekin hitz egiterik ez dute bentrilokuoek

limoiondoak hasi dira udareak ematen

bihotz taupada bakoitzarekin

saguzarrak jaiotzen dira

gure barneko katedralean

erotismorik gabeko irudimen urriko gauak

euren autorretratuez maitemintzen diren margolariak

sexualitate zargalduen erakustareto ezkutuak

marrazoak noraezean isatsa zakar astintzen

fosforozko aurpegien aurka

lastozko jainkotasunen aurka

indarkeriari esker bizi gara

eta lapurtutako krabelinei esker

zatoz niregana bizitzari buruz hitz egitera

zatoz nirekin heriotza ehizatzera

elkarri eskua emanda desagertu dira

inozentzia eta mirespena