BENEDICTINE

portu aldetik geltokiko burdinbide saila

liburu bateko lerroak iduri

haratago moila transatlantikoa

baskularen eraikin modernista txipiarekin

bagoiekin traktoreekin lokomotorekin

garabiak higidura dotoreetan bodegak husten

baforeak lurrun zurrutak jaurtika pilotuari deika

nahiago hil!

likore fabrikak harrobi aldetik

marie brizard publizitatea paretan lau margoz handi

licorera vasca burdinazko hizki gorriekin

benedictine bere usainarekin

suedia eta norvegiako kontsulatua bere arranoekin

kontsularen alabak masta baino tenteago

medikuarenak bizikletan espaloitik

sardintzar kutxak elizako arrosa-leiho

gartziandiareneko fruta artean

nahiago hil!

baten batek belarrira

bizia zen hiriburuak gainbeheran utzia zuen

ibili samurreko malda hau

gorpuak ere handik gora joaten zituzten hilerrira

gure lagunen baten anaia txipia

gurutze prozesionalarekin

apaiza haren atzetik estola lepoan

misala eta zigarroa esku banatan

musika bandako batzuk metal doinu ilunean

eta ni beherantz trenbide aldeko espaloitik

beste inor ez

benedictineko anis eta limoi usainean xarmaturik

nahiago hil!

ez zen hildakoa izan

hildakoa hila bazen

lantegiko atarira irten ziren

benedictineko emakumeak

gazteenak ez ziren sinatu gurutzea pasatzean

malda hartan bertan azalduko zen lehenago

florentino anaien kamioneta

ur arrasto bat utziz makadamean

odol arrasto bat

gau oroz eginiko krimenaren froga zekarten

kako zorrotz beldurgarri hura gangster pelikula bat

tabernetara banatzeko

izotz blokeak apurtuz garbitzen zutena

nor izan ote zen zergatik niri belarrira

zer baino nahiago

institutuko lanetan hasten nintzen aldiro

atelier mekaniko zaharraren gaineko gela nagusian

lanpararen ondoan

aitak egina benedictine botila bereziarekin

nahiago hil!

baten batek belarrira

nahiago hil!

ez zen hildakoa izan

hildakoa hila bazen

bazen zer edo zer

fuelaz eta kresalaz eta alkoholaz haratago

hiriak gainbehera bultzatutako errepide zati honetan

isileko zer edo zer ozeneko zer edo zer