IKASTEA ETA IKASTEA

nik irakatsiko dizut

atzekoz aurrera irakurtzen

hamar arte zenbatzen

mihia ahosabaian ziztu egiten

nik irakatsiko dizut

harri begidunak jaurtitzen

habiak ezkutatzen

zinezko gezurrak esaten

baina egun zoaz eskolara

nik irakatsiko dizut

esna zaudela hegaldatzen

putzu txipian itotzen

sagarrak eta sagarrak bereizten

nik irakatsiko dizut

azterketetan kopiatzen

tinta izerditzen

nire sinadura itxuratzen

baina egun zoaz eskolara

nik irakatsiko dizut

txoritan ibiltzen

jotzen duten doinuan ez dantzatzen

hankak baino burua arinago izaten

nik irakatsiko dizut

Eiffel dorrea askatzen

lotsatu gabe galdetzen

ikasitakoa ahanzten

baina egun zoaz eskolara

nik irakatsiko dizut

berba zatarrak esaten

hormetan idazten

hanka plateran sartzen

nik irakatsiko dizut

iltzeak oker sartzen

eta zeure atzamarra mailuka lehertzen

nik irakatsiko dizut

ez dakidan gitarra jotzen

ni bezalakoa ez izaten

nik irakatsiko dizut

dena kolokan jartzen

baina egun zoaz eskolara

bihar bihar piper egiten

irakatsiko dizut bihar

Greziako uharte txipi batera

joanen gara bizikletan

eta zuk Arkimederen teorema

irakatsiko didazu zuk

ni arduragabekeria hutsean

hondoratzen naizela ni

    1991