ERAIKUNTZA GREBAN

aztoramen handi batek hartua du hiria

eraikuntzak duelako gaur erabaki greba

nekatua omen dago uztarriko idia

bat eginik daude orain Bizkaia eta Magreba

gorriz behar da markatu egutegian data

eraikuntzak duelako gaur erabaki greba

beherago ezin omen bertan gora soldata

bat-batean lana dute laga bertan behera

hiria museo dugu eskurik bako harri

eskorga pala plomada pikotxa mila tresna

umezurtz gelditu dira guztion ikusgarri

eraikuntzak duelako gaur erabaki greba

inork ez daki zergatik baina denok dakigu

eraikuntzak duelako gaur erabaki greba

bihar izanen garela munstro baten gatibu

hiri osoan haserre ezkutu bat erne da

trafikoa moteldu da lanera heldu ezin

eraikuntzak duelako gaur erabaki greba

amodiozko hitzordu mordoa da huts egin

horrelaxe dute pizten alferrek beti gerla

paretak beteak daude pintaketaz afixez

eraikuntzak duelako gaur erabaki greba

piketeak hor dabiltza amenazuzko hitzez

halakoz beteko balitz Siberiako trena

hodei beltzez estali da hiriaren sabaia

eraikuntzak duelako gaur erabaki greba

ez lege barruko greba baizik opor salbaia

mila eta bat barrikada goiz honetan erre da

langileek utzi naute malenkoniak jota

gai baitira obratzeko nik atzo egin ametsa

tristuraz gaixorik nago ezer ez zait inporta

eraikuntzak duelako gaur erabaki greba

    2005