BASATZETAKO URRETXINDORRA

bere buruaz lotsa zatar ez bestea

arin ezkutatzen da ikarak apoa

somatzen baldin badu inoren pausoa

gorrotagarri zaio ilargi betea

beldurtu egiten da apotxoa zinez

harri baten azpian gorderik ardura

edo baldarki jausiz sortu den putzura

hanka egin behar du zu maita ezinez

        apo, apo

        isilik hago!

        hire maite ederra

        lotan baitago

korroka honek izan nahi luke hitza

maiteminez daudenen hasperen mingotsa

apo lotsati hori neu nauzu bihotza

maluros bizi naizen bufo vulgarisa

ilargitik mundura kantu bat tristerik

zureganaino hegan ametsez hor doa

ene kontra altxatzen baduzu orpoa

xangrinez hilen nauzu zanpatu gaberik

        apo, apo

        isilik hago!

        kantari ematen duk

        itsusiago

zatarra izatea omen da bekatu

huts horrek egiten dit ariman zarrapo

zu edertzeko baina sortu nintzen apo

kantari nahi didazu orain debekatu?

badakit ez zarela zu horren doilorra

nazka eman badizu nik daukadan antzak

liluratuko zaitu ene kantu latzak

ni naiz basatzetako ai urretxindorra

        apo, apo

        isilik hago

        ene zapatapean...

        hi hilik hago!

    1998

    Musika: Joseba Tapia