BUFO BUFOREN KORROKA

maitasunaren arlote

igelek hala diote

mihi gaiztoek naute bihurtu

apo nintzena apote

bele samaldak artotan

gezurra dabil ahotan

akelarrean ari nintzela

serorarekin apotan

ba omen daukat pozoina

berotzen duena soina

apoa lehertu nahirik jaso du

epaileak bere oina

beltza da gaur gauerdia

sarobean da ardia

torturatuak salatu du nik

jan dudala ilargia

ederrak dira egiak

apoen apokeriak:

nik janen ditut nik janen ditut

Pierre de Lancreren begiak

euriak ezponda busti

apoak egin du jauzi

maiteminduen musikak gozo

isiltasuna du hautsi

mendian sendo arroka

behorra zuzen labroka

William Drury hil zenuten baina

ez da isildu korroka

    1998

    Musika: Joseba Tapia