MUSTILAKO ERREKA

Mila erreka emaritsu daude

infernura eramaten dutenak.

Mila erreka, mila istorio.

Maizter bizi gara

maizterrak garelako,

Iñarburu izeneko baserri abandonatuan.

Beltzak ikusitakoak gara

Mustilako errekan beheiti.

Ez dira samurrak bertako istorioak,

erreka urik gabe gelditu zenekoa adibide.

Errekak, ura izan edo ez,

errekak izaten dira beti.

Mugaldean, bereziki.

Orain, inor ez da Mustilaz oroitzen

ezta bere seme-alabez ere.

Hauek ez baitira mugaldean jaio

urrutiko hiri arrotz batean baizik.

Bertze mintzo bat dute, bertze izate bat,

mustilatarrak izan arren.

Aise ahantzi dituzte

inork kontatu ez dizkien istorioak.

Arrunt aise.