EGUNEROKO ILUSIOA

Hogeitaka urteko gatazkaren ondoren

auto kontroletan

zoriontasun gehiegikeriagatik atxilotuta

jujeek artxibo zaharretan errekisatzen dituzte

zure aitorpenak

mugaz bestaldekoen kontuak

eta porrot bat iragartzera datorren isiltasuna

Mezu zartatuak biltzen dituzu ezpainetan

eta etsipen apur bat

zure barrunbe urduriak kateatzera

Mina dabil airean

begietan sumatzen ez bazaizu ere

Etengabeko guduak nekatu egiten du bat

Samingarria da etxera itzuli eta

gutun zatiak aurkitzea

Nor da gai bere beso ahulen indarrarekin soilik

etxeko harroinei eusteko?

Desarmatuta zaude galera handienak ekiditeko

Orain larruzko jainkoak maite dituzu

rock izarrak

gerraren ondorioz erabilpenik gabe

geratu diren aireportuak

lurretik barreiatuta dauden mapak

eta begiak inguratzen dizkizun lurra

inongoak bagara oraindik ere

Orain arrainak eta zapatak

eskuz ehizatzeari utzi diozu

denbora da gurasoek etxera deitu ez dutela

Nork ez du bakarrik utziko duten beldurrik izan?

Nork ez du guztia galtzeko beldurrik izan?

Orain iraultza txikiekin amesten duzu

haizeak proletarioen etxeetako arropak baino

ez ditu astintzen hemen

eta berri txarrak datoz hegoaldetik

Berriz ekingo diozula

berreraikiko dituzula oinarriak

Argazkiak eta gutunak erreka ertzean

eta porrot bat iragartzera datorren isiltasuna

Hezetasuna besterik ez dabil zerupean

eta kartoizko armadura igarota

ireki zaizun zauria

etorkin bihotzetan

Munduarekiko zabaldu duzun hondarrezko babesa

Amaitzen ez den hogeitaka urteko gatazka

oraindik bihar