ARTXIPELAGOA: KONTINENTEAREN HONDARRAK

Ez dakigu zerk apurtu gaituen

baina ez zaigu arrotz korronteetan bagoaz

Portuetan inork ez gaitu elkarrekin maite

eta gurean

hondoa jo dutenek bakarrik hartzen dute lur

atzazal artean ziurtasun apur bat behar dutenek

inorako bidea jarraitzeko

Talka egitea bakarrik geratzen zaigu

zoriaren zain egotea

inertzia eta bide berak zapaltzea

Kasualitate gehiegi dira aho bi ukitzen

horregatik ez duzu nahi esplikaziorik soberan

Laztanak baino latzago diren

borrokak biluzik

ezpainen edo marearen talka geratzen zaigu

Oreka faltsua da ez aurreratzea

eta balantza zalantzen ondorioa

Laprast egiterainoko egia eta

hezetzen gaituen ezinegona

Gabeziak eta zero

                eta zeru bat aterpe

Ontzia ainguratuta dagoela iruditu zaigu

baina uraren azpian ez dugu lurrik sentitu

Mila zati egin gara

mina pieza bakar egiteraino