ANFIBIOA

Udako eguraldi eguzkitsuaz

bankariak etorri ziren hiriburutik

karramarro txikiak harrapatzera

Portutik aurrera joan ginen

hondartza ikusten zen urruti

basamortua hazten zitzaigun bizkarrean

Haitzetan jesarri ginen

gerriz gora biluzik

zangoak sartu genituen uretan

atzazalak zahartu bezala zuritu zitzaizkigun arte

eta maxkaldu urtaroz kanpoko sagarren modura

Inork ez zituen uholdeak zenbatu

ez eta izurriteak ere

Inor ez zen pasibitate zoriontsu honen errudun

berdin etorriko zen hilobi bat aurkitzeko garaia

edo Iraila

edo izozkiak saltzen zituen emakumea

musukatzeko aukera

Pozik geunden ametsak sortzeko adina

burujabe ginelako

Gero udako ekaitza datorren bezala

abioi astunak etorri ziren

eta gure paretik arin igaro

aitorpen bat sekretu bat

edo korapilo bat askatu bailuten

Minetik jaregin ziren

min materialetik

Materia ez da desagertzen

eraldatu egiten da

Horra gerrak halabeharrez irakatsitako fisika

Eztarriak lehortu zitzaizkigun hautsez

eta oihu egiteaz

Bihotzak heze zeuden eta zangoak fresko

korrika bizkor egiteko

Inork ez zuen gerrara joan nahi