Galdetu al diozu behe-lainoari

noiz arte gelditzeko asmoa duen?

Noizbait etxeko gela guztiak

ikuskatu al dituen?

Barrideen aje eta nondik norakoen

berri duen?

Galdetu al diozu

baserri aitzineko zuhaitzari

adar-jantziak astindu dituen

haizete erauntsiak

sagar-dantza

abiaraziko duen goizalderaino?

Galdetu al diozu noizbait

iturriko urari zergatik den ur

eta ez esne?

Eta ilargiari

zergatik den erdi?

Eguzkiari zergatik ezin diozun

distira ebatsi?

Galdetu al diozu

zure ahotsarekin mintzo den horri

zergatik zu

zergatik orain

zergatik dena hain zuri,

zergatik den heriotza

bat-batean lausotzen doan

izpi eternala.