Inork ez zigun erakutsi

tontorrerainoko biderik laburrena,

ez eta libertateari nola dantzatu.

Inork ez zigun jakinarazi

ekaitzen oinatzetik

norabide bat kausituko genuela.

Basapiztiak saihesteko baino

ez genuen burua biratzen.

Kateatutako bihotzak

saskietan pilatu genituen

errebolta berrien izerdiarekin

busti ziren artio.

Betileen kartzelapean,

zozoak hegaldatzen.

Inork ez zigun erakutsi

amets ezkutuenen irrikak

izarren argipean

borobildu genitzakeela.

Lubakien paisaian

bisaia berriak.