Euriak

lurra biguntzen duen

ilunabar hertsietan

traktorearen gurpilek

lerro aunitz

irekitzen dituzte

aspaldian zeharkatu

ez dugun belaiaren

zilkoan.

 

Inozentzia galdu genuen

etxeen arteko

pasabideetan

 

zerbait puskatu zen.

 

Atzendua izanen dugu

elkartzen gineneko

basorako bide laburra,

erromatar zubia

saihesten zuen hura.

 

Ireki gabe

zeharkatzen genuen atakan

dilinda batean

jarraituko ote dute

betierekotasuna

ziurtatzen ziguten

zumezko zintzilikariek?

 

Traktoreak bere bidean

utzitako errestoen gisan

ote gaudelakoan nago

 

galduak,

norabide zehatzik gabeak.