Oasietan urei giza irudia ezarriko diet

abegitsu

desertuko harea aleak laztantzen

mendietan paperezko hodeiak eta bi lagun

eramango ditut

gura dutenean elkar daitezen eta ortzean galdu

txanponetan kresala margotuz

urduri egongo naiz marea igo zain

arima ugari itsasoz blai

neure eskuekin

erantsiko diot ekiari adatsa

bizien artean banatuz ezpata suzkoak

jainkoaren aurka

ezpainetan negua hankaz gora

haurrei kontatzeko orbela ta elurrak

nondik nora egin zuten txango

txikiak zirela

pozik nago

haizea harro dabil loreetan

gauak inausteko etxola