Etsaientzat mehatxu izan behar dut

 

Agostinho Neto poetari, Angolako
Herri Errepublikako presidentea: 1976

 

 

                             1

 

Ez naiz gehiago aise ibiliko

nire beldur zareten horien atzetik:

                                                     izan beldur.

Zirikatu nahi ditut zuen nerbio dantzariak,

aurpegiko tikak.

Ez naiz gehiago espaloietatik begirunez ibiliko

eta bereziki eskaini nahi diet hau

nire pausoak

edo supermerkatuko orgatxoaren triki-traka motela

entzun

biratu

ni ikusi

eta presatzen direnei

ni omen naizen izugarrikeria honetatik ihesi:

odoltsu loratuko naiz arratsalde batez,

nire kideez inguratuta

izugarrizko mendekua kantatuko dut erritmo

errukigabe

urdurietan

 

Baina

gizon itsu bat ikusi dut bere aurpegia aztertzen.

Arratsean mahaia jarri dut eta eseri naiz

berriak jatera.

Aldizka

noa lotara.

Ez dago barkatuko nauenik.

Hildakoei bost axola zaie.

Metroa burrunba betean estazioan sartu aurretik justu

txanpona telefonoan sartu duen

maitale baten antzera bizi naiz,

mezua alferrik galduta

deiaren arrazoia ito zait:

 

suntsigarri nahiz ahazkor baina berandu

eta betiere salbatu edo kondena nazakeen

zera horren atzetik.

 

Nire patuaren ekintza izan behar dut.

 

 

                    2

 

Zenbat neba eta ahizpa

hilko dizkidate

neure buruari erakutsi aurretik

mendekua?

Kopuru bat botako dugu?

Hegoafrikan adibidez:

hamar milatik gora

urtebete baino lehen, baina bost

milatik behera erailko dituzte sei hilabetean

ados al

BAINA ZER DEMONTRETAN NABIL?

 

Etsaientzat mehatxu izan behar dut.

 

 

                        3

 

Eta inoiz

nik inoiz ihes egiten uzten badizuet zuei,

nire unibertsotik erauzi beharreko horiei,

lurretik erabat kauterizatuta behar zenuketen horiei

(lege eta ordenazale zakilak, lehen graduko

terroristak),

orduan utzi nire gorputza arimari huts egiten

deabruzko haragikerian

 

Eta inoiz

nik inoiz ihes egiten uzten badiot maitasunari,

bulkada eta errealitatearen

ordez (nire mimosa-zuhaitz basatietako

Flamenko-loreak),

gorrotoa eta zurrumurruak

bilakatu direlako nik o-

beditzen ditudan mamu-aginduak,

utzi maitasunak

uko egin diezadan.

 

Izan behar dut

etsaientzat mehatxu izan behar dut.