Sankt Aleksander Nevski katedral ederrean

ikono izarniatsu artean kuzkurturik

dagoen atsoaren antzera, begi lauso,

xuxurlatzen ditut elur santuen izenak,

letania zaharrak, ene mila arrazoi,

popeak ulertuko ez lituzkeen suak,

gure hasperenak kandela ttipiak urtzen.

Liturgiaren kantu lasaiak bukatzean

buruko zapia egokitzen du atsoak,

eta nik, antzera, behar den hitza atontzen

etxera aurretik ogia eta gurina

erosteko indar doia emango diguna,

etxera aurretik barnea eta keinua

maskaratzeko kemena emango diguna.