LEIHO BAT ZABALIK

Jabier Muguruzarentzat

Kaleak ez dauka izenik,

eta bera ere gorpu da

poliziaren izaren azpian.

Hartaz geratzen da bakarrik...

leiho bat zabalik.

Auzoak ez daki zergatik,

beti agurtzen zuten elkar:

ez daki hil nahi ote zuen

edo akaso ez-bizi soilik.

Leiho bat zabalik.

Hilabete joan da jadanik,

presaka pasa naiz gaur

eta iragan da iragana.

Hartaz geratzen da soilik...

leiho bat zabalik.

Nik ez dakit zergatik;

inork itxi ez duelako den

edo orain beste norbaitek

zabaltzen duelako jadanik.

Leiho bat zabalik.